Die neie Mieter


Zwää Weiwer tratschen uff de Gass,
die Kättsche un die Liss.
De Zuzuuch is kä erschti Klass,
kän Glicksfall, ganz gewiß.
Im Owwerg’schoß vum städtisch Block
sin Fremde uffgetaucht:

„Die komisch Brut im ledschte Stock
die hett merr nit gebraucht!
Hoscht g’sähne, wie die kumme sin
mit ehrm Schamott un Schrott
un warscht bei dänne schun mol drin?
Was die e Buddik hot!“
So schilt die Liss un d’ Kättsche nuggt;
sie babblen sich in Raasch.

„Die gäwwen a(n), lien wie gedruckt;
die sin „von drüben“, die Bagaasch!
De Alt hockt meischtedääls dehäm.
Ich glaab der hot kän Job,
läwen uff unser Koschte ganz bequem
un stellen noch de Kopp!
Die määnen b’stimmt, sie weeren wer,
traa’n d’ Nase ziemlich hoch
un duhn als weern se Millionär –
un erscht ehr bleedi Sprooch!“
befft d’ Lisbeth schun mit Schaum vorm Maul
un feierrotem Kopp.

 

[zurück] [Buch bestellen]