Kerzephilosophie

Sechs Kerze, in ’rer Schublad drin,
verzehlen grad vum Läwenssinn:
”Ach”, seifzt die glää Kerz voller Fruscht,
”wie schrecklich, wann d’ verbrenne muscht!
In dämm Fall bischt en arme Drobb:
Du krie(g)scht e Flämmsche uff dein Kopp,
werscht irgendwu schää uffgedischt
bis d’ norre noch en Stumbe bischt
un fliegscht am Schluß, ganz hämlich still,
gedankelos dann in de Mill!”

”Ich selwer mecht e Daafkerz sei,”
platzt jetzt die weiß Kerz zwischenei,
”deet ämol an de Kin(d)daaf brenne
un’s Vertiko mein Stammplatz nenne.”

”Geh,” lacht die grie(n), ”des hot kään Zweck!
Do stehscht not rum, staabscht zu mit Dreck.
Wer korz bloß brennt, kummt nit in Schwung
un läbt als Art Eririnerung!”

”Ich,” määnt die rot Kerz, ” ’s is kään Scherz,
ich weer am liebscht e Weihnachtskerz!
Am Chrischtbaam in die Wohnstubb g’stellt,
weer ich Symbol vum ’Licht der Welt’!” ...

E klänni Kerz aus Bienewachs die motzt uff ämol:
”Uhne Flachs, ich fer mei Dääl, ich saach’s eich grad,
bin zum Verbrenne viel zu schad!
Merr sollt’ sei Winsch’ nit iwwertreiwe.
Ich mecht gern in de Schachtel bleiwe!”

”Was,” faucht die bloo Kerz, dick un drall,
”im Karton gammle? Uff kään Fall!”
Die annre Kerze – zamme viere –
duhn ganz energisch prodeschtiere.
Sie sin sich äänich in de Not:
„Wer niemold brennt, der is schun dood!“ ...

[zurück] [Buch bestellen]