Gedankelos

Die Oma un de Oba, kloor,
sin bääde iwwer 80 Johr.
Doch d’Oma duht sich nit geniere
un recht un schlecht ehrn Haushalt fiehre.
De Oba, 84 grad,
noch ziemlich fit un akkurat,
en junge Alde jedenfalls,
der helft de däbblich Oma als.

Doneilich, morgens in de Frieh,
do richt die Oma ’s Friehstick hi(n)
un wie se so ehrn Kaffee lebbre,
do heert merr doch die Oma bebbre:
»Ach Gott, des is jo nimmi schää –
ich hab fascht kä Gedanke meh’!
Wann hab ich bloß die Eier bääd
ins kochend Wasser neigele(g)t?
Die sollten doch als Friehsticksei
letschden Endes wachswääch sei(n)!«
»Reg dich nit uff,« seggt ruhich er
’s is hechschtefalls e halb Stunn her!«

[zurück] [Buch bestellen]